Institut haqida

Toshkent vrachlar malakasini oshirish instituti
institut

   O‘rta Osiyo vrachlar malakasini oshirish instituti (hozirgi Toshkent vrachlar malakasini oshirish instituti) O‘rta Osiyo Respulikalaridagi shifokor kadrlarning malakasini oshirishga bo‘lgan ehtiyojidan kelib chiqib, Prezidiumi Kengashining 1932 yil 22-iyunida №459 Qaroriga asosan tashkil topgan.

    Toshkent vrachlar malakasini oshirish institutining maqsad va vazifalari faoliyatning ilk davridanoq aniq belgilab olindi:
– shifokorlarni malakasini oshirish va ixtisoslashtirish;
– ilmiy kadrlarni tayyorlash;
– sog‘liqni saqlash tizimiga tashkilotchi rahbarlarni tayyorlash;

    Institutning rivojlanish bosqichlari sog‘liqni saqlash tizimining eng qiyin davrlariga to‘g‘ri keldi.   O‘sha davrlarda respublikaning  shahar va qishloqlarida vrachlarning malakasini oshirish va ularni qayta tayyorlash, milliy kadrlarni shakllantirish, aholiga ko‘rsatilayotgan tibbiy xizmatning sifatini oshirish, o‘ta xavfli yuqumli kasalliklarni oldini olish va ularni bartaraf etish masalalari eng katta muammolardan biri bo‘lgan.

   Mashaqqatli bir davrda institutda kafedralarning o‘quv uslubiy, ilmiy-amaliy  faoliyatini tashkil qilish, ularning moddiy-texnika bazasini mustahkamlash kabi vazifalar og‘ishmay amalga oshirib kelindi. Birinchi marotaba 6 ta kafedra ish boshladi va 84 ta vrachning malakasi oshirildi. Hayot bilan hamnafas tarzda institut ham taraqqiy etib bordi va sog‘liqni saqlash tizimida kadrlarning malakasini oshirish va qayta tayyorlash bo‘yicha o‘z faoliyatini takomillashtirib bordi.

    Institutga tamal toshini qo‘ygan, uning rivojiga ulkan hissa qo‘shgan yirik fan arboblari, professor-o‘qituvchilar, assistentlar o‘zlarining fidoiy mehnatlari bilan institut hayotida o‘chmas iz qoldirdilar. Toshkent vrachlar malakasini oshirish institutining sobiq rektorlari J.S. Pulatov, M.B. Sultonov, Z.A.Daminov, M.A.Mirzamuhamedov, Q.S.Zoirov. X.X.Xusanov  va A.R.Raximjanovlarning ushbu  dargohni bugungi nufuziga erishishida benazir mehnatlari bor.

   Uzoq yillar davomida shakllanib, rivojlanib, davr talabiga moslashib borgan Toshkent  vrachlar malakasini oshirish institutida turli davrlarda faoliyat olib borgan mohir  ustoz pedagoglarning xotirasi, bizga qoldirgan bilim va tajribalari doimo yodimizda saqlanadi. Ularning nomlarini ehtirom ila tilga olamiz, professorlar S.A.Aʻzamxo‘jaev, N.A.Shamatov, K.Yu.Yuldoshev, N.K.Boboxo‘jaev, Z.M.Jamolova, A.S.Zarzar, G.T.Ibragimov, D.S. Karimov, A.A.Kalanxodjaev, X.N. Muratova, A.R. Mansurov, Sh.Sh. Shomansurov va boshqalar.

   Prezident Farmonlari va Qarorlarida, “O‘zbekiston Respublikasi sog‘liqni saqlash tizimini isloh qilish Davlat dasturi” , “Kadrlar tayyorlash milliy dasturi”, “Sog‘lom avlod uchun” Davlat dasturlarida uzluksiz taʻlimni takomillashtirish, mutaxassislarni butun mehnat faoliyati davomida kasbiy mahoratini oshirib borishga imkon yaratadi. Kadlrlarni malakasini oshirish va ixtisoslashtirish bugungi kunning eng dolzarb masalalaridan biri sanaladi.

    Yillar davomida Toshkent vrachlar malakasini oshirish institutining nufuzi ortib bordi ammo maqsad va vazifalari o‘zgarmadi. Institutda olib boriladigan ilmiy tadqiqotlar, yaratilgan o‘quv-uslubiy qo‘llanmalar diplomdan so‘ngi o‘qitish va qayta tayyorlash tizimini takomillashtirishga va yuqori malakali vrach kadrlarni tayyorlashga xizmat qildi.

    Hozirgi kunda ToshVMOIda 50 ta kafedrani qamrab olgan 5 ta fakultet faoliyat olib boradi:
– Tibbiy profilaktika va UASh tayyorlash fakulteti;
– Terapiya fakulteti;
– Xirurgiya fakulteti;
– Pediatriya fakulteti;
– Klinik ordinatura fakulteti.

     Respublikadagi eng nufuzli, yetakchi ilmiy-amaliy tibbiyot markazlarida institutning o‘quv bazalari joylashgan bo‘lib, RShTTYoM, RIKIM, Gematologiya va qon quyish ilmiy tadqiqot instituti, V.Vohidov nomidagi xirurgiya ilmiy markazi, Teri-tanosil kasalliklari ITI, Ftiziatriya va pulmonoligiya ITI, Pediatriya IATM, Travmatolgiya va ortopediya ITI shular jumlasidandir.Institutda tolmay mehnat qilib kelayotgan 300 ta professor-o‘qituvchilar tarkibida 3 ta akademik, 86 ta tibbiyot fanlari doktori, 60 ta professor va 150 dan ortiq tibbiyot fanlari nomzodi, 50 ta dotsent bor. Ularning ko‘pchiligi “O‘zbekiston Respublikasi sog‘liqni saqlash aʻlochisi” nishoniga sazovor bo‘lishgan.

     Vrachlarni malakasini oshirish va ularni ixtisoslashtirish 60 ta tibbiyot yo‘nalishi bo‘yicha olib boriladi. Institut olimlari tomonidan uzluksiz taʻlimning sog‘liqni saqlash tizimidagi asoiy tamoyillari yaratilgan bo‘lib, kunduzgi va sirtdan-masofadan o‘qitish uslublari joriy qilingan va 400ga yaqin vrach kadrlar masofadan o‘qitildi. Kafedralarda o‘quv jarayoni yangi texnologiyalar asosida olib boriladi. Institutning fundamental kutubxonasi bugungi kunda 150 mingdan ziyod  tibbiyot sohasidagi adabiyotlar va  xorijiy davriy nashrlar  bilan taʻminlangan.

     Institutda ilmiy tadqiqotlar olib boruvchi yosh olimlar faoliyatiga alohida eʻtibor qaratilgan bo‘lib so‘ngi 3 yil davomida  37 ta aspirant va doktorantlar muvaffaqiyatli ilmiy dissertatsiya ishlarini nihoyasiga yetkazdi. Klinik ordinaturani 500 ga yaqin yosh vrach kadrlar o‘zlari tanlagan ixtisosliklar bo‘yicha tugalladi.

    ToshVMOI  ko‘plab  yetakchi  tibbiyot  muassasalari va nufuzli xalqaro  miqyosdagi tashkilotlar bilan o‘z hamkorligini yo‘lga qo‘ygan: TTA, ToshPTI, TASIS Yevropa tashkiloti, “Vrachlar chegara bilmaydi” Britaniya vrachlar assotsiatsiyasi DOTS, SDS,  MAGAETE, Yevroat, Jahon Bankining “Salomatlik” loyihalari, Germaniyaning Getengens, Turkiyaning Mersiys universitelari shular jumlasidandir. Institutda Xalqaro aloqalar bo‘limi faoliyat olib boradi. Professor-o‘qituvchilarning yarmidan ko‘pi xorijiy mamalakatlarda o‘tkaziladigan xalqaro ilmiy-anjumanlar, o‘quv seminarlar, malaka oshirish kurslarida ishtirok etishgan.

     Institutda maʻnaviyat targ‘ibot bo‘limi faoliyat olib boradi,  yoshlar orasida taʻlim-tarbiya ishlari, maʻnaviyat va maʻrifat sohasida ham salmoqli ishlar amalga oshirib kelinmoqda.